Während der Gmeindrat mit de Planigsfritze zu Nonstopsitzige tuet zämesitze, heisst’s cool, mer müess verdichtet boue, de Wort vo Planer blind vertroue.

Drum plant me Block um Block i grüeni Matte grad schön der eint im andere sim Schatte und zwüsche drin, si chöi chum meh schnufe, bigt me am Hang no chlini Blöckli ufe.

Oh du schöne, oh du schöne
Oh du schöne Schnitzelbank

Die ZPP verlangt viu Gwärb für Wohle, doch wo zum Tüfu söu me das ga hole? Mit eme Dorfplatz het me d’Chappelehärze grüehrt und zumene Ja zum Wettbewärb verfüert.

Me chönn de schön im Alter wohne, bim Kreisel i der nöie Zone, ichoufe, Kafi näh, flaniere und zwüschemönschlech kommuniziere.

Für’s Plätzli mit de Böim u Bänkli, da flösse Ström vo Schwyzerfränkli i’d Kasse gäb’s e Hufe Batze, me heig’s im Griff, fescht i de Tatze.

Im Untergrund entsteit derwil es Gflächt, die Planig sig ja guet und rächt. Und d’Gsellschaft, ehrewärti Manne, tuet sech zum Spekuliere zämespanne.

Im Untergrund da zieht me d’Fäde, was söus, mir wei doch keini Läde. Die Alte si nid üsi Chunde, mir chöme besser über d’Runde.

Mir bitte d’Banke um Kredit, die mache sicher wieder mit. Em Gmeindrat mache mir’s de klar, und Autochappele wird wahr ….!

Mir zieh se übere Tisch die Fläsche mit Autohandu, tanke, wäsche, mir stige z’Chappele i ganz gross, drum: rafft und nehmet - Achtung fertig los!

Zerscht a der Bernstrass Richtig Wohle, De göh mer d’Chappelebrügg ga hole, Bim Mühlispil als dritte Stei Trage mer no der Dorfplatz hei.